بناری “لەندی شێخان” – “سمایل قەززاق”

خێوەتی شەو بە سەر وڵات داکشاوە , شەوێکی پاییز , وڵاتێکی بێ هەست و خووست , تاریکە شەوێک گولـلە نایبرێ , ئەنگووست لە چاو , کزەی بایەکی سارد تێکەڵی تاریکی و بێ دەنگی  وەک تەم و مژ دەشت و دەر و کێوی داپۆشیوە , عاسمان کەشەورە نێو نێوە گرشە گرشی ئەستێرەیەکی رووناک لە کەلێن پەردەی رەش وەدەر دەکەویێ و پاش ساتە وەختێک وون دەبێ و جێ گۆرکێ بە زریوە زریوی ئەستێرێکی دیی دەدا .
لە دورە دەست سۆگەی ڕۆژهەڵات تیزماڵی  رووناکی لێ وەدەر دەکەویێ و بە پارێز و پێخۆر باریکایی زێدەتر و پان تر دەبێ , هەورەکان بەڕیز و تویێ توێ لە سەر یەک لەنگەریان گرتووە , بە یەکەم گزینگی رۆژێ جوانترین نەخش و نیگار دەنخشێنن, لەگەڵ کازیوە ڕەنگ هەڵدێنن , سوور, سوورێکی ئاڵ , سوورێکی کاڵ , نارنجێکی ئاماڵ زەرد وەک جاجم و کری دەستی جوڵا بەری شەبەقی ئاسۆ دەتەنن , سوور وەک پتەی خوێن , ئاڵ , ئاڵێکی تۆخ , زەرد زردێکی زێڕین ـ بۆریکی ڕوون , شینێکی دەریایی , کەسکێکی گەش لەچەشنی  ڕەپستە ,  وەک ڕەوە ئەسپی کوێستان, سوور , سوور کوێت , شێ, شێ خەزاڵ, شین بۆرە , سپی , بە ئەسپایی و خورد لێک دەترازێن لە پەنایی یەکتر ڕادەبن  , هەر پەڵە هەورە بەشە رەنگێکی پێ براوە , خودای جوانی بەو بەیانیی زوویە دیمەنێکی هێناوەتە سەر شاشەی عاسمان چاوی بینەر بزمار کوتی رامانی نیگای دەکا.حەیرانێکی خۆش دەنگی دێی
ئەوە سەحرە گەلی دۆست و برادەران ئەوە سەحره

……..